BIG DATA E NOVOS MEDIOS

BIG DATA E NOVOS MEDIOS

Contidos transmedia e Internet

• Posibilidades que ofrece Internet no mundo transmedia
• Soportes de distribución de contidos
• O produtor transmedia

Os universos transmedia permiten que unha soa historia sexa comunicada a través de múltiples plataformas adaptándose a distintos medios. Grazas a isto conséguese chegar a un maior número de público co que se crean unhas conexións moi fortes baseadas na interactividade. Outro elemento clave nunha produción transmedia será a interconexión e sincronía narrativa que exista entre os produtos.

Nos últimos anos tivo lugar unha auténtica revolución nos universos transmedia coa introdución das novas tecnoloxías e Internet. Internet multiplica as posibilidades de inmersión na historia á vez que axuda a consolidar o concepto de prosumer (novo ideal de consumidor que abandona a pasividade receptora para aportar as súas propias contribucións ó universo transmedia – como os coñecidos fanfiction). As posibilidades que ofrece Internet ó sector son infinitas, destacando entre as máis comúns as seguintes:

• Creación de páxinas web oficiais. Dan a coñecer o produto na rede á vez que actúan como soporte de outros contidos. Dependendo do carácter do produto presentarán distintas ofertas, dende contidos á carta para as series de televisión, ata outros máis interactivos como poden ser os podcasts.
• Blogs ou video blogs. Outro tipo de soporte son os blogs ou vídeo blogs relacionados co contido e nos que atopamos unha fonte importante de interactividade. Poden tratarse de espazos producidos polos propios creadores do contido, como é o caso da exitosa serie de televisión americana Mad Men, a cal empregou diferentes blogs para seguir desenvolvendo a ficción. Por outra parte, a creación de blogs preséntase como unha posibilidade aberta para o público, contribuíndo así á formación da interactividade, xunto coa promoción e a popularidade do produto.
• As redes sociais. O uso das redes sociais preséntase como un dos piares fundamentais para o mundo transmedia. Plataformas como Twitter, Facebook ou Instagram son empregadas como medios para continuar co desenvolvemento da ficción por parte dos creadores. O público pode compartir as súas aportacións (relatos, debuxos, memes, animacións...) de maneira sinxela a través destes medios, outorgándolles así a característica de vertente transmedia de maior interactividade. Isto abre as portas ao desenvolvemento ilimitado da comunidade de fans. Un dos primeiros exemplos destas plataformas interactivas en España aportaríao a serie de Antena 3, El Barco, producindo a través de Twitter unha serie de twittersodios sobre a serie. Por outro lado, a actual serie de TVE, El Ministerio del Tiempo, sumouse a esta iniciativa para innovar e ofrecer novas experiencias relacionadas coa aplicación de Whatsapp. Cada semana escollen 10 espectadores para que formen parte dun grupo de Whatsapp como “becarios” do Ministerio.
• Creación de foros. Pode tratarse de foros oficiais ou foros creados polos espectadores. Calquera das dúas vertentes axuda a reforzar o conxunto da comunidade de fans e a establecer vínculos entre eles.
• Tendas on – line dos produtos. Espazos adicados á venta de produtos de merchandising sobre o contido. Un exemplo disto constitúeo a xa mencionada El Ministerio del Tiempo, que abriu a súa propia tenda virtual onde se poden adquirir produtos creados polos seus propios espectadores inspirados na serie.
  Por outra banda, motivados tamén polas ferramentas que aporta Internet, dispoñemos de diversos soportes de distribución de contidos transmedia, onde destacan:
  Smartphones, tablets e apps second screen.
  O Smartphone e a tabler preséntanse como dúas das ventás máis empregadas na visualización de contidos audiovisuais hoxe en día. É por isto que as cadeas produtoras de contidos non quixeron desaproveitar esta oportunidade e crearon as chamadas “apps second screen”, unha plataforma perfecta para extender os lazos do universo transmedia. Cadeas de televisión xeralistas xa se sumaron á iniciativa aportando apps como A3conecta, MTVXtra ou +TVE. Estas aplicacións aprovéitanse da crecente tendencia multitasking nos usuarios que empregan diversos dispositivos conectados simultáneamente.
  As second screen apps ofrecen diversas posibilidades como son a profundización nos contidos desenvolvidos polo produto, a sincronización do contido que se esté visualizando co dispositivo portátil, ou a retransmisión e comentarios nos programas en directo de tweets ou outros elementos relacionados coas redes sociais.
  Por último, resulta interesante analizar a figura do produtor audiovisual, un elemento esencial no universo transmedia. Igual que o fixeron os demais compoñentes, o produtor transmedia tivo que evolucionar para adaptarse ós novos modelos relacionados coa aparición de Internet. Aparte das súas labores convencionais, actualmente os produtores transmedia teñen que adicarse a outras tarefas relacionadas co desenvolvemento dos novos contidos interactivos. É a súa responsabilidade unificar a historia que conforma o produto nunha “Biblia Transmedia” onde se expliquen as características do proxecto. Tamén debe intentar centralizar o universo evitando posibles fracturas e divisións no mundo narrativo. Outro punto do que se encarga será a elección do modelo de negocio pertinente para o proxecto, tendo en conta elementos fundamentais no transmedia como o merchandising ou os produtos licenciados. Ademais é a súa tarefa xerar e coidar a participación das audiencias a través dos novos medios e as plataformas anteriormente comentadas.
  Publicidade e Internet:
  - Tipos de formatos
  - Ventaxas e inconvintes
  - Adblockers
  - O usuario e a publicidade
  A publicidade en Internet ten como finalidade dar a coñecer un produto ao usuario online por medio de distintos formatos. No referente ás ventaxas e inconvintes que acompañan ço novo tipo de publicidade resaltamos seguinte:
  Inconvintes:
  O inconvinte principal da publicidade online constitúeo a falta de estandarización, a cal dificulta a realización de estudos e análises que obteñan resultados fiables sobre os resultados dos formatos. Isto ocasiona complicacións á hora de invertir no sector.
  Vantaxes:
  A publicidade online presenta unha grande variedade de posibilidades dependentes da creatividade, constituíndose como un tipo de publicidade máis interactivo e personalizado. Ademais, os anuncios personalizados son un dos tipos de publicidade con maior índice de recordo por parte do usuario, segundo o apuntado polo Estudo de Inmersión Publicitaria en Medios Dixitais de 2013, elaborado polo IAB.
  Neste estudo tamén se nos informa de que Internet ocupa a segunda posición na lista de medios de comunicación escollidos para facer publicidade, alcanzando o 20,7% da inversión, só superado pola televisión, que chegou ao 40,1%. Os principais anunciantes foron as empresas de automoción, cun 16,8%, as de telecomunicacións e tecnoloxía, cun 9,1% e as de finanzas e seguros, que acadaron o 8,2% do total. Por outra banda, resulta interesante mencionar o papel que interpretan os coñecidos adblockers no entramado da publicidade online. Os adblockers son aplicacións que permiten aos usuarios filtrar os anuncios que se mostran na navegación web. O seu uso presentouse como un tema moi controvertido e como un claro conflito entre os fabricantes de anuncios e os promotores de tales aplicacións.
  Esta controversia deriva da cualidade da publicidade como principal fonte de ingresos para as páxinas web e o principal fundamento que sustenta a gratuidade da web. Cos adblockers o usuario dispón da capacidade de anular estes anuncios polos que previamente un anunciante pagou. Este conflito tamén foi trasladado ao plano xudicial, no cal se revelou a súa legalidade e o dereito a que os usuarios controlen a súa navegación e a limitación publicitaria nesta.
  Relación do usuario coa publicidade:
  Actualmente os usuarios aceptan de mellor maneira a publicidade televisiva que a publicidade online. Aínda sendo a proporción de publicidade da televisión á carta inferior á da televisión convencional, a tolerancia fronte á primeira preséntase en niveis moito máis baixos por parte do espectador. Tales datos están ligados á idea que predomina na maioría dos usuarios de que os contidos en Internet deben ser gratuítos. Por outra parte, e a pesar da concepción anterior, as redes sociais constitúense como unha das vías máis populares na aceptación de publicidade, mentres continúa desenvolvéndose. Segundo información aportada polo blog de Innovación Audiovisual fundamentada en datos da IAB, Facebook incrementou os seus ingresos publicitarios notablemente nos últimos anos, igual que Twitter, onde medraron un 97% no ano 2014. Estímase tamén que YouTube ingresou en 2014, só en Estados Unidos, máis de 1130 millóns de dólares en publicidade. Spotify, co seu doble modelo fremium, é a terceira rede que maior crecemento experimentou en España no 2014, seguido por Linkedin e Instagram.